Nagpakita sang suporta ang Knights of Columbus sa Dugong Bombo 2026 sang Bombo Radyo Koronadal paagi sa pag-awhag sa ila mga miyembro nga magpartisipar sa bloodletting activity agud makabulig sa mga pasyente nga nagakinahanglan sang dugo.
Sa interview sang Bombo Radyo Koronadal, ginpahayag ni GK Mamerto Bolivar, miyembro sang Knights of Columbus, nga importante ang pagdonar sang dugo bangud daku ini nga bulig sa mga tawo nga nagakinahanglan sang blood transfusion, ilabi na sa mga pasyente nga nagaatubang sang emerhensya.
Ginpahayag man ni Bolivar nga ang aktibidad indi lamang limitado sa mga miyembro sang Knights of Columbus kundi bukas man sa tanan nga handa kag kwalipikado nga magdonar sang dugo.
Samtang, ginpaambit man niya nga handa siya nga liwat magdonar sang dugo, apang bangud senior citizen na siya, indi na sigurado kon makapasar pa siya sa medical assessment kag blood donation requirements.
Paagi sa amo nga aktibidad, ginpabaskog ang panawagan sa publiko nga magbuligay kag magdonar sang dugo bangud ang isa ka boluntaryo nga donasyon mahimo makabulig sa pagluwas sang kabuhi sang mga pasyente nga nagakinahanglan sini.
