Nagpaandam ang PDEA South Cotabato sa publiko nga indi basta-basta magbaton ukon mag-abri sang mga parcel nga wala gin-order ukon wala nahibaluan ang sulod, bangod posible nga ginagamit ini sa pagpalusot sang ilegal nga droga.
Sa interview sang Bombo Radyo Koronadal, ginpahayag ni Investigation Agent V Brenda Joy Pollisco, provincial officer sang PDEA South Cotabato, mahimo madalahig sa kaso ang receiver kon makaptan sini ang ilegal nga sulod sang parcel, apesar pa ginapahayag nga wala siya nag-order sini.
Ginpahayag man ni Pollisco nga ginagamit sang mga drug trafficker ang nagkalain-lain nga pamaagi agud matago ang kontrabando kag malikawan ang detection sang delivery scanners.
Lakip sa mga ginatumod nga taguan sang shabu ang stuffed toys, parte sang rice cooker kag idalom sang sandals.
Indi lamang shabu ang posible nga ginapadalagan paagi sa parcel delivery, kundi pati marijuana oil nga ginahalo sa mga vape products.
Bangod sini, ginapanawagan sang PDEA ang publiko nga maghatag sang impormasyon parte sa posible nga ilegal nga aktibidad kag siguruhon nga kilala ang nagpadala kag nahibaluan ang sulod sang mga parcel antes ini batunon.
