Duha ka panukala nga ginpasaka sang mga Representante sang Akbayan ang natalana nga talakayon sa plenaryo sang Kamara, nga nagatinguha nga mapabakod ang proteksyon batok sa pag-abuso kag diskriminasyon.
Lakip diri ang Safe Spaces Act Amendments ukon House Bill 768, nga nagapanawagan sang mas mabug-at nga silot sa grooming ukon paghimulos sang pagsalig sang kabataan agud sila maabuso. Nagalakip man ini sang mas estrikto nga mga tikang batok sa online sexual harassment, lakip ang malisyoso nga paggamit sang AI kag deepfake.
Nagapanawagan man ang panukala sang maid-id nga pagsusi sa mga empleyado sang mga eskwelahan, kag pagsilot sa mga opisyal ukon kawani nga wala nagahimo sang nagakaigo nga tikang sa pag-atubang sang mga reklamo.
Samtang, ang SOGIESC Equality Bill ukon House Bill 765 nagatinguha nga dumilian ang diskriminasyon bangud sang sexual orientation, gender identity, gender expression kag sex characteristics, ilabi na sa mga ulubrahan kag institusyon sang edukasyon.
Nagapanawagan man ini sang patas nga pag-angkon sang serbisyo sa ikaayong lawas kag iban pa nga serbisyo publiko, agud masiguro ang patas nga pagtratar kag proteksyon para sa tanan.
