Ginpakilala na sang Miss Universe Organization ang bag-o nga korona nga pagasuksok sang madaug sa ika-75 nga edisyon sang Miss Universe.
Ginpangalanan nga “The Radiance of an Eternal Legacy,” ang korona gin-unveil sa San Juan, Puerto Rico, sa tion sang pagtililipon sang mga delegado para sa 2026 nga pageant, lakip na ang pambato sang Pilipinas nga si Bea Millan-Windorski.
Ginhimo ini halin sa 18-karat nga puti nga bulawan kag ginbutangan sang 3,150 ka diamante. Desinyo ini nanday George Wittels kag Maison d’OR nga nagasimbulo sang 75 ka tuig nga kasaysayan kag legasiya sang Miss Universe.
Tatlo ka dagku nga diamante sa tunga sang korona ang nagasimbolo sa nagligad, karon kag palaabuton sang pageant, lakip ang mga kababayin-an nga nagbukas sang mga kahigayunan, nangin instrumento sang pagbag-o kag magapadayon sang legasiya sini sa palaabuton.
Samtang, nagadugang na ang pagpaabot sa padulong nga Miss Universe pageant sa Nobyembre 24, agud mahibaluan kon sin-o sa mga delegado ang mangin masunod nga tag-iya sang bag-o nga korona.
