Nagdangat na sa siyam ka barangay sa Koronadal City ang nakabaton sang deklarasyon nga drug-cleared kag drug-free, samtang ginahulat pa ang dugang nga pagbulig kag pag-usisa agud madugangan pa ang mga barangay nga makabaton sang amo man nga kahimtangan.
Sa interview sang Bombo Radyo Koronadal, ginpahayag ni Rey D. Calanao, Action Officer sang City Anti-Drug Abuse Council (CADAC), nga base sa pinakabag-o nga resulta sang ila pagmonitor, walo ka barangay sa syudad ang nadeklarar na nga drug-cleared, samtang isa naman ang nakabaton sang deklarasyon nga drug-free.
Suno kay Calanao, luwas sa siyam ka barangay nga nakabaton na sang amo nga mga deklarasyon, may lima pa ka barangay nga nag-agi na sa pag-usisa kag nakatuman sang mga kinahanglanon kag sertipikasyon nga ginapatuman sang Department of Health (DOH).
Ini amo ang Barangay Topland, General Paulino Santos (GPS), Rotonda, New Pangasinan kag Saravia.
Ginpahayag ni Calanao nga naglab-ot na sa bahin sang paghulat ang ila talatapan para sa dugang nga bulig halin sa Philippine Drug Enforcement Agency (PDEA), agud mapadayon ang pag-usisa kag proseso sa pagdeklarar nga drug-cleared sang nasambit nga lima ka barangay.
Dugang pa niya, daku nga hangkat para sa Koronadal City ang pagpasiguro nga ang tanan nga barangay sa syudad mangin drug-cleared kag sa ulihi makabaton sang drug-free nga kahimtangan.
Gani, padayon ang paninguha sang CADAC nga madugangan ang kadamuon sang mga barangay nga makabaton sang amo nga mga deklarasyon, samtang ginahingyo man ang pagbulig sang nagkalain-lain nga ahensya kag sang mga pumuluyo sa pagpakigbato kontra ilegal nga droga.
