Gina-panugyan sang Office of the Building Official (OBO) Koronadal City ang mga tag-iya sang mga establisemento kag mga panimalay nga siguruhon ang pagsunod sa Building Code paagi sa pagkuha sang nagakaigo nga building permit kag pagkompleto sang mga kinahanglanon nga dokumento.
Sa interview sang Bombo Radyo Koronadal, ginpahayag ni OBO Head Engineer Charlie Laput, nga handa ang ila opisina nga maghatag sang guidance sa mga aplikante, lakip na sa mga architects kag engineers, sa pagpreparar sang plano kag requirements.
Ginpahanumdom man sini nga ang mga establisemento nga nagalapas sa building regulations makabaton sang first notice nga may tatlo ka adlaw nga pagtugot agud magresponde.
Kon wala gihapon sang aksyon, mahimo ini mahatagan sang final notice kag ma-negative listing, nga makaapekto sa pag-apply ukon pag-renew sang business permit kag pagbayad sang real property tax. Gindugang ni Laput nga mahimo man masiraduhan ang mga establisemento nga nagapadayon sa operasyon nga wala sang nagakaigo nga business permit.
Gani, ginapabutyag sang Office of the Building Official nga indi kabudlayan ukon dugang gasto ang pagkuha sang building permit, kundi importante nga tikang agud masiguro ang kalig-on kag seguridad sang mga propedad kag establisemento.
Gin-agda man ang publiko nga magpalapit sa ila opisina para sa dugang nga impormasyon kag bulig sa proseso sang pagkuha sang building permit.
