Ginpahayag ni Education Secretary Sonny Angara nga ang promosyon sang mga opisyales kag empleyado sang Department of Education (DepEd) dapat ibase sa performance, competence, kag kontribusyon sa serbisyo publiko, sa baylo nga sa mga koneksyon sa politika ukon may “backer.”
Ini ang ginpahayag ni Angara sa iya mensahe kadungan sang inaugural Literacy and Numeracy Expo, nga ginhiwat kadungan sang isa ka “Training of Trainers on the Institutionalization of Technical Assistance on Instructional Delivery” sa syudad sang Iloilo.
Ginhatagan pagtamod sang tiglikom nga ang mga katapo sang staff nga nagapakita sang pagkaexcellence, integridad, kag dedikasyon sa paghimo sang ila mga katungdanan dapat kilalahon kag hatagan sang mga oportunidad.
Suno sa iya, ang pinasahi nga serbisyo publiko dapat mangin panguna nga basehan sa pagkilala sa isa ka empleyado kag pag-abante sa ila sa mas mataas nga posisyon.
Ginklaro pa ni Angara nga wala sang lugar sa DepEd ang paggamit sang political influence agud masiguro ang promotion, bangud dapat patas kag merit-based ang paghatag sang oportunidad para sa mga personnel.
Ini nga inisyatibo kabahin sang mga panikasog sang Departamento sa pagpabakod sang propesyonalismo kag pagsiguro nga ang mga school staff may ikasarang kag nagakabagay sa mga responsibilidad nga ila ginahimo.
Suno sa tiglikom ini ang tinutuyo nga mapasanyog ang kalidad nga edukasyon para sa mga estudyante sa bug-os nga pungsod.
