Ginkwestyon ni Senator-Judge Raffy Tulfo ang pagpanghanda sang ikaapat nga testigo sang depensa nga si Atty. Suzette Balucanag-Punay sa nagapadayon nga impeachment trial batok kay Vice President Sara Duterte, partikular sa alegasyon nahanungod sa unexplained wealth.
Suno kay Tulfo, ginapaabot niya nga may bastante nga ihibalo ang testigo sa rason sang iya pagtawag sa witness stand, ilabi na kay may kaangtanan ini sa pagpaathag sang mga kuwestiyon parte sa pinansyal nga kahimtangan sang Bise Presidente.
Apang, napansin sang senador nga madamo sang pamangkot ang wala nasabat ni Punay, lakip na ang mga pamangkot sang prosekusyon kun ang kwarta nga nabaton ni Duterte ginakabig bala nga return on investment ukon return of capital.
Bangud sini, ginlaygayan ni Tulfo ang testigo nga kuntani mas ginpangandaman kag gin-research anay ang mga detalye antes mag-atubang sa impeachment proceedings.
Gindugang pa sang senador nga bisan 15 na ka tuig nga abogado si Punay, nagapaabot gihapon siya nga mas preparado ini sa pag-atubang sa mga pamangkot nga may kaangtanan sa iya testimonya.
