Nagapabilin nga mabudlay ang pangabuhian sang mga traysikol driver sa Syudad sang Koronadal bisan pa may yara sang ₱16 nga pagnubo sa presyo sang gatong, bangud mataas gihapon ang presyo sang gatong kun ipaanggid sa ila adlaw-adlaw nga kita.
Sa interview sang Bombo Radyo Koronadal, ginpahayag ni Manong Joel Tayco, isa ka traysikol driver, nga mas dako pa ang ila nagagasto sa pagpatubil nga nagalab-ot sa masobra ₱400, kun ipaanggid sa ila kinitaan sa pagpamasada.
Suno sa iya, nagadugang ang ila kalugi bangud dako nga bahin sang ila kita ang nagakadto lamang sa pagbakal sang gatong nga nagabalor gihapon sang ₱90 tubtob ₱100 kada litro.
Samtang, ginpahayag man ni Tayco nga wala pa nila mabatyagan ang benepisyo sang fare increase sa Koronadal City bangud wala pa ini opisyal nga ginapatuman kag wala pa sila sang nagakaigo nga pamatuod para makapanukot sang mas mataas nga plete.
Bangud sini, nagapabilin sa ₱15 ang naandan nga plete sang mga pasahero sa baylo nga ₱20.
Kaangot sini, nagapanawagan si Tayco sa mga nagakaigo nga ahensya kag lokal nga panguluhan nga talupangdon man ang sitwasyon sang mga traysikol driver nga nagapangatubang sang nagadugang nga gasto sa pagpangabudlay.
