Matigdas nga nanindugan si former South Cotabato 2nd District Representative Dr. Peter Miguel nga pasakaan sang kaso ang tanan nga may kaangtanan sa pagpalapta sang ginaalegar nga 2027 budget insertion sa House of Representatives.
Sa interview sang Bombo Radyo Koronadal, ginpahayag ni Miguel nga wala siya malipay kag nasakitan siya sa pagpalapta sang indi matuod nga impormasyon nga batok sa iya ngalan.
Ginpabutyag niya nga preparado siya nga maghimo sang legal nga tikang batok sa mga nagahimo kag nagapalapta sang amo nga mga alegasyon.
Ginpaklaro man sang anay mamalidha nga indi na siya aktibo sa pulitika gani wala sang rason nga i-angot pa ang iya ngalan sa nasambit nga isyu.
Dugang pa niya, indi lamang ang orihinal nga nagpalapta sang impormasyon ang iya pasabton kundi pati ang mga nag-share kag nagpalapta sini sa social media.
Ginpahayag ni Miguel nga kinahanglan manabat sa idalom sang layi ang tanan nga responsable sa pagdaut sang iya reputasyon.
Gani, determinado siya nga magpasaka sang kaso agud mapanabat ang mga nagpalapta sang iya ginaalegar nga malain kag indi matuod nga impormasyon kag matudluan ang tagsa ka indibidwal sang leksyon batok sa pagpalapta sang fake news.
