Posible nga matapos antes Nobyembre 30 ang impeachment trial ni Vice President Sara Duterte kon matapos sang iya defense team ang pagpresentar sang mga ebidensiya sa sulod sang napulo ka adlaw sang pagdinig.
Ini ang ginpahayag ni House lead prosecutor kag Batangas Representative Gerville Luistro sang Nobyembre 2, samtang ginahulat ang liwat nga pagpadayon sang proceedings.
Suno kay Luistro, daku ang posibilidad nga mabuhinan ang 30 ka trial days nga ginpangayo sang depensa, kasunod sang pag-withdraw sang House prosecution panel sang tatlo sa apat ka Articles of Impeachment batok kay Duterte sang Oktubre 13.
Lakip sa mga gin-atras nga alegasyon ang indi husto nga paggamit sang confidential funds, pagpanuhol kag seryoso nga pagpamahog.
Apang gin-athag ni Luistro nga ang pinal nga iskedyul sang impeachment trial magadepende gihapon sa pag-aprubar sang Senate impeachment court, lakip na ang kadamuon sang mga testigo nga ipresentar sang defense team.
“Posible po na matapos ito bago ang katapusan ng Nobyembre,” suno kay Luistro.
Dugang pa niya, may rason sila nga magpati nga daku ang mabuhin sa 30 ka adlaw nga gin-allocate para sa trial, kag posible nga mangin napulo na lamang ini ka adlaw.
Kon maglapaw sa napulo ka adlaw ang pagpresentar sang ebidensiya sang depensa, posible nga magpadayon ang trial tubtob Disyembre.
Sa pihak sini, nagalaum si Luistro nga matapos ang kaso antes ang Paskwa agud may katapusan na ang proseso kag makapadayon na ang tanan.
Samtang, temporaryo anay nga gin-suspende ang impeachment trial agud mahatagan sang tion ang mga komite sang Senado sa pagdeliberar sang ginaduso nga national budget para sa 2027.
Ginalauman nga liwat nga magabukas ang Senate impeachment court sa Nobyembre 9, alas-10 sang aga.
