Nagpaandam ang Philippine Institute of Volcanology and Seismology (PHIVOLCS) sa publiko batok sa paglapta sang fake news may kaangtanan sa magnitude 7.8 nga linog nga naglupok sa baybayon sang Sarangani sang nagligad nga semana.
Sa ila opisyal nga pahibalo, gin-paalintonan sang ahensya ang publiko nga indi magpati gilayon sa mga nagalapta nga impormasyon kag sa baylo magkuha lang sang update halin sa opisyal nga website kag online accounts sang DOST-PHIVOLCS.
Lakip sa ginpamatud-an nga sala nga impormasyon amo ang ginapahayag nga magnitude 8.2 nga linog nga naglupok sa eksakto nga oras, bangud wala pa sang teknolohiya nga makahatag sang eksakto nga petsa kag oras sang linog.
Ginpabutyag man sang ahensya nga sala ang pahayag nga ang linog naghalin sa mga bulkan sa idalom sang Sarangani Bay.
Ginpaklaro sang PHIVOLCS nga tectonic ang ginhalinan sang linog sang Hunyo 8 kag ini bangud sa paghulag sang Cotabato Trench, kag wala sang aktibo nga bulkan sa idalom sang Sarangani Bay.
Ginsaysay pa sang PHIVOLCS nga sala man ang pagpati nga ang mga litik kabukiran kag baybayon amo ang fault lines nga nagtuga sang magnitude 7.8 nga linog.
Suno sa ila, ang mga litik sa kabukiran amo ang tension cracks nga mahimo magresulta sa paghugno sang lupa, samtang ang mga litik sa baybayon kag suba ginatawag nga lateral spread nga resulta sang liquefaction kag indi aktibo nga faults.
