Ginduso sang City Environment and Natural Resources Office (CENRO) ang mas responsable nga pagdumala sang basura sa tagsa ka panimalay agud mabuligan nga mapunggan ang nagadugang nga basura sa sanitary landfill sang Barangay Paraiso, Koronadal City.
Sa interview sang Bombo Radyo Koronadal, ginpahayag ni Engr. Abril Ma. A. Lebanan, Supervising Environmental Management Specialist sang CENRO, nga isa sa mga dako nga hangkat sang lokal nga gobyerno ang pagpangita sang bag-o nga lugar nga mangin alternatibo nga waste disposal area.
Dugang niya nga indi mahimo nga padayon lamang nga gamiton ang area bilang habuyan sang basura bangud may limitasyon man ang available nga lugar.
Gani, gin-awhag niya ang publiko nga sundon ang husto nga waste segregation kag mabuhinan ang mga basura nga ginahaboy sa landfill.
Gindugang niya, nga importante ang aktibo nga partisipasyon sang tagsa ka residente agud maminusan ang basura, malikawan ang problema sa waste disposal kag mapabilin nga matinlo ang syudad.
