Nagapauli na sa Pilipinas ang 14 ka Filipino seafarers nga naluwas matapos maangkon sang ila ginasakyan nga barko ang pag-atake sang drone sa baybayon sang Bulgaria.
Suno sa Department of Migrant Workers (DMW), ginalauman nga mag-abot sila sa Clark International Airport sini nga Lunes, Nobyembre 2, matapos maluwas sang mga awtoridad sang Bulgaria.
Suno sa report, sakay ang mga Pilipino sa isa ka Liberian-flagged container ship nga gin-atake sang drone sang Oktubre 28.
Nagahalin ang barko sa Haifa, Israel kag padulong kuntani sa Constanta, Romania sang natabo ang insidente.
Naghatag naman sang bulig ang Labor Office sang Philippine Embassy sa Budapest.
Nagkadto pa sa Varna, Bulgaria ang embassy staff nga si Sheila May Navasquez agud kamustahon ang kahimtangan sang mga seafarer kag maghatag sang pinansyal nga asistencia.
Suno sa mga nakaluwas, gilayon sila ginmanduan sang kapitan nga maglukso halin sa barko matapos ang una nga drone strike.
Naglab-ot pa sa duha ka oras antes sila nakabaton sang rescue assistance.
Padayon naman ang paghatag sang bulig sang gobyerno agud masiguro ang kaluwasan kag maayong kahimtangan sang mga Pinoy seafarers sa ila pagbalik sa pungsod.
