Nagdangat na sa 10,060 ang kumpirmadong kaso sang Ebola virus sa Democratic Republic of Congo (DRC), samtang nagapadayon ang paglapnag sang balatian sa nagkalain-lain nga bahin sang pungsod, suno sa datos sang Ministry of Health sini.
Sa pihak sang mga tikang nga ginahimo sang gobyerno agod mapunggan ang pagsaka sang kaso, dako gihapon nga hangkat ang pagsumpo sa outbreak, bangud halos katunga suno pa sang mga kumpirmado nga natapnan ang napatay bangud sa balatian.
Ang presente nga outbreak, nga nagsugod sang Mayo, ginhalinan sang Bundibugyo virus, isa ka klase sang Ebola nga wala pa sang aprubado nga bakuna ukon espesipiko nga bulong batok diri.
Dugang pa nga nagapabudlay sa pagsabat sa krisis ang malain nga kahimtangan sang imprastraktura, ang indi malinong nga sitwasyon sa pila ka lugar bangud sang armado nga tensyon, kag ang paglapnag sang sayop nga impormasyon parte sa balatian.
Halin sa tatlo ka probinsya, naglapad na sa walo ka probinsya ang sakop sang outbreak, nga nagapektar sa 66 ka health zone.
Samtang, may mga ginreport man nga kaso sa iban nga bahin sang Africa, lakip ang Nigeria kag Kenya, nga nagadugang sa kabalaka parte sa posible nga mas malapad nga paglapnag sang virus.
Padayon nga ginaatubang sang mga awtoridad ang hangkat sa pagpugong sang pagtakud sang balatian, pagpalig-on sang mga serbisyo sa panglawas, kag paghatag sang husto nga impormasyon sa publiko agod malikawan ang dugang nga mga kaso sang impeksyon kag kamatayon.
