Gin-awhag ni President Ferdinand Marcos Jr. ang mga Pilipino nga himuon nga inspirasyon ang kabuhi kag mga sakripisyo sang ila mga pinalangga nga napatay paagi sa pagpakita sang kaayo kag pagbulig sa isigkatawo.
Sa iya mensahe para sa pagdumdom sang All Saints’ Day kag All Souls’ Day, nagpahayag ang Presidente sang iya pagpakig-upod sa mga Katoliko kag sa bug-os nga pumuluyo sang Pilipinas sa pagsaulog sini nga mga adlaw.
Suno kay Marcos, ang pagbisita sa mga sementeryo isa ka kahigayunan agud magpangamuyo, magdumdom sang matahum nga mga panumduman kag magtipon liwat ang mga miyembro sang pamilya.
Gindugang sang Presidente nga bisan wala na sa ila pisikal nga presensya ang mga pinalangga, magapabilin gihapon ang ila gugma kag mga panumduman sa tagipusuon sang mga nabilin.
Ginpahanumdom man sang Presidente ang publiko nga sundon ang kaayo kag pagkamabinuligon nga ginpakita sang mga santo kag sang mga tawo nga nagsakripisyo para sa ila komunidad.
Dugang pa niya, indi lamang dapat ipakita ang gugma kag pagpalangga sa mga napatay, kundi pati man sa mga buhi nga nagakinahanglan sang bulig.
Suno sa Presidente, mangin mas makahulugan ang Bagong Pilipinas kon magapabilin nga buhi sa tagsa ka Pilipino ang espiritu sang kaayo, pagbinuligay kag pagmalasakit sa isigkatawo.
