Nagpagwa ang Department of Migrant Workers (DMW), katimbang ang iban pa nga ahensya sang gobyerno, sang ₱13.76 milyon nga livelihood assistance para sa mga returning overseas Filipino workers (OFWs) sa idalom sang National Reintegration Network (NRN).
Suno sa DMW sa isa ka news release sang Miyerkules sang gab-i, base sa datos sang Hunyo 8, naglab-ot na sa 5,769 ka anay kag repatriated OFWs ang nakabaton sang bulig gikan sa programa.
Sa numero nga ini, 5,013 ang anay OFWs samtang 756 naman ang mga bag-o nga repatriated workers.
Tuyo sang NRN nga buligan ang mga OFW nga magtukod sang magagmay nga negosyo, makapangita sang trabaho, ukon maka-reintegrate sa pungsod matapos ang ila trabaho sa abroad.
Suno sa DMW, bahin ini sang mas masangkad nga reintegration program para mabuligan ang mga migrant worker nga makapanugod liwat sang palangabuhian sa Pilipinas.
Naghatag man ang ahensya sang entrepreneurship training para sa mga benepisyaryo agud ihanda sila sa pagtukod sang negosyo.
Magluwas diri, may job matching, skills training, kag psychosocial support man nga ginahatag sa mga OFW kag ila pamilya.
Sa kabug-usan, naglab-ot na sa 28,361 ka serbisyo ang nahatag sang DMW, kalakip ang job referrals, training vouchers, scholarships, kag welfare support.
