Nakapreparar na ang Korona 911 sa pagresponde sa posible nga mga emerhensiya kag insidente sa tion sang pag-obserbar sang Pista Minatay kag Kalag-kalag sa Nobyembre 1 kag 2.
Sa interview sang Bombo Radyo Koronadal kay City Disaster Risk Reduction and Management Officer Cyrus Urbano, iya ginpahayag nga padayon ang monitoring sang ila talatapan bilang Emergency Communication Center agud masiguro ang seguridad kag kaluwasan sang publiko sa nasambit nga mga inadlaw.
Ginpahayag man ni Urbano nga padayon nga ginabantayan sang ila talatapan ang mga sementeryo nga ginalauman nga pagadagsaan sang mga tawo nga magabisita kag magahatag pagdumdum sa ila mga pinalangga nga nagtaliwan na.
Samtang, magadeploy man sang mga responders kag personnel sang CDRRMO sa mga strategic nga lugar bilang kabahin sang seguridad kag pagseguro sang gilayon nga pagresponde sa bisan ano nga emerhensiya.
May kaangtanan sini, ginpahanumdom ni Urbano ang publiko nga likawan ang pagdala sang mga bladed weapon, sound system kag makahulubog nga ilimnon sa mga sementeryo.
Ginlaygayan man niya ang tanan nga mag-inom sang bastante nga tubig agud malikawan ang dehydration, labi na sa tunga sang mainit nga panahon kag kadamuon sang mga bisita.
Ginpaseguro man ni Urbano nga nakaalerto kag naka-standby ang mga otoridad para sa gilayon nga pagresponde sa mga emerhensiya kag paghatag sang nagakaigo nga assistance.
Gani, gin-awhag niya ang publiko nga indi magduhaduha sa pag-report sa Korona 911 kon may makita nga problema ukon kinahanglanon nga bulig agud madasig nga mahatagan sang aksyon kag masiguro ang kaluwasan sang tanan.
