Ginkabig ni South Cotabato Vice Governor Arthur Pingoy Jr. nga ang padayon nga pagnubo sang presyo sang liveweight sang baboy amo ang nagapakita sang problema nga gin-atubang sang lokal nga mga hog raiser kag sang industriya sang pagpamababoy sa pungsod.
Sa interview sang Bombo Radyo Koronadal, ginpahayag ni Pingoy nga isa sa mga ginapatihan nga rason sa manubo nga presyo sang buhi nga baboy amo ang padayon nga importasyon sang karne sang baboy halin sa iban nga pungsod.
Bangud sini, nagapati ang bise gobernador nga dapat ikonsiderar sang national government ang temporaryo nga pagpauntat sang importasyon agud mahatagan sang kahigayunan ang lokal nga mga magbababoy nga makabangon.
Dugang pa ni Pingoy, indi kuntani limitado sa temporaryo nga bulig, kaangay sang paghatag sang feeds, ang solusyon nga ihatag sa mga hog raiser, bangud mahimo lamang ini makapahagan-hagan sang ila kabudlayan sa malip-ot nga tion.
Suno sa iya, kinahanglan ang mas malawig kag epektibo nga mga tikang nga magaatubang sa gamot sang problema, ilabi na sa presyo sang liveweight sang baboy, agud masiguro ang padayon nga pangabuhian sang mga lokal nga hog raiser kag ang kalig-on sang industriya sang pagpamababoy sa pungsod.
