Apesar malayo sa Pilipinas, padayon nga ginadumdom ni Elvie Aviador Pregua, Bombo International News Correspondent to Israel, ang iya mga himata nga nagtaliwan na paagi sa pangamuyo kag pagsindi sang kandila sa pagsaulog sang Todos los Santos kag Pista Minatay.
Sa interview sang Bombo Radyo Koronadal, ginpahayag ni Pregua nga simple lamang ang iya pag-obserbar sang Todos los Santos kag Kalag-kalag sa Israel, bangud indi pareho sa Pilipinas ang kinaandan nga mga tradisyon sa pagdumdom sa mga minatay.
Suno sa iya, sa baylo nga maghiwat sang madamo nga aktibidad, ginapili niya nga maghatag sang tion sa pagpangamuyo para sa iya mga pinalangga sa kabuhi nga nagtaliwan na. Apesar yara siya sa luwas sang pungsod, nagapabilin nga importante sa iya ang paghinumdom sa pamilya kag mga himata nga nagtaliwan na.
Dugang pa ni Pregua, may mga Katoliko man sa Israel nga nagatambong sa simbahan kag nagasaulog sang misa agud magpangamuyo para sa ila mga himata nga nagtaliwan na.
Nagapakita ini nga apesar nagakalain-lain ang mga pamaagi sa pagsaulog sang Todos los Santos kag Kalag-kalag sa nagkalainlain nga pungsod, nagapabilin ang pagtuo kag pagdumdom bilang paagi sang pagpadayon sang koneksyon sa mga hinigugma nga wala na.
Samtang, para sa mga Pilipino nga yara sa iban nga pungsod, ang Todos los Santos kag Kalag-kalag isa man ka higayon nga magpamalandong kag maghatag sang tion sa pamilya, apesar pa nga ginbulag sila sang kalayuon.
Paagi sa pangamuyo, nagapadayon ang pagdumdom sa mga himata nga nagtaliwan apesar wala sila makaupod sa ila pamilya sa Pilipinas sa sini nga tion.
