Magapakigbahin ang 6th Infantry Division sang Philippine Army sa “Dugong Bombo 2026” paagi sa pagpasakop sang ila mga tinawo sa natalana nga one day bloodletting activity sa Nobyembre 14.
Sa interview sang Bombo Radyo Koronadal ginpahayag ni Lt. Col. Ronald Suscano, spokesperson sang 6th Infantry Division (6th ID), nga importante ang pagdonar sang dugo bangud nagahatag ini sang daku nga bulig sa mga pasyente nga nagakinahanglan sang pagtughong sang dugo, ilabi na sa tion sang emerhensya.
Gindugang sini nga ang regular nga pagdonar sang dugo ang makabenepisyo man sa ikaayong lawas sang donor, samtang ang nakolekta nga dugo mahimo nga ibutang sa Philippine Red Cross blood bank bilang reserba nga supply para sa mga kinahanglanon sa medisina.
Hiwaton ang bloodletting activity sa KCC Mall sang Cotabato, sa diin magapakigbahin ang 6th ID personnel.
Ginpasalig man nu Suscano, nga mahimo man mag-upod sa aktibidad sa Koronadal ang iban pa nga units nga naka-station sa syudad sang Koronadal, syudad sang Tacurong, kag banwa ka Tupi.
Ginpabutyag man ni Suscano ang suporta sang 6th ID para sa “Dugong Bombo 2026,” nga tuyo nga makabulig sa pagdugang sang supply sang dugo para sa mga nagakinahanglan.
Gina-engganyo man ang publiko nga magpartisipar sa sini nga blood donation drive kag mag-amot sa pagluwas sang kabuhi.
