Nagapanawagan sang kaangay nga proyekto ang mga vendor sa Koronadal Public Market para sa paghan-ay sang mga talipapa sa syudad, agud mabuligan nga mapauswag liwat ang ila baligya kag pangabuhian.
Sa interview sang Bombo Radyo Koronadal kay Manang Nene, isa sa mga vendor sa public market, ginrekomendar niya nga kon may proyekto ang city government sa paghan-ay sang mga vendor sa higad sang dalan, kuntani magpatigayon man ini sang tikang para sa mga talipapa sa downtown area.
Suno sa iya, mahimo nga hatagan sang puwesto ang mga talipapa sa mas malayo nga lugar halin sa sentro sang syudad agud mahatagan sang patas nga oportunidad ang mga vendor sa sulod sang public market nga makabaligya kag makakuwarta, pareho sang ila naagyan sang una.
Gindugang ni Manang Nene nga kinahanglan nila nga makakuha sang bastante nga kita agud mabayaran ang ila binulan, quarterly kag tinuig nga obligasyon, apang nagapabudlay sini ang nagagamay nga mga manugbakal nga nagasulod sa merkado.
Suno sa iya, nagamatumol na ang ila baligya ilabi na halin alas-4 ukon alas-5 sang hapon tubtob alas-7 sang gab-i, bangud naganubo ang kadamuon sang mga tawo nga nagabisita sa merkado.
Bangud sini, nagalaum ang mga vendor nga hatagan sang lokal nga gobyerno sang kaangay nga pagtalupangod ang ila sitwasyon kag makapatuman sang mga solusyon nga makabulig sa pagbalanse sang oportunidad sa pagpangabuhi sang mga vendor sa public market kag sang mga nagabaligya sa talipapa.
