Ginakabig nga Generally peaceful sa gihapon ang South Central Mindanao kag nagapabilin ang kalinong sa bilog nga rehiyon sa diin wala sang dapat nga ikabalaka ang mga pumuluyo.
Ini ang pagpasiguro ni Lt.Col. Roland Suscano, Spokesperson sang 6th Infantry Division, Philippine Army, sa interview sang Bombo Radyo Koronadal kasunod ang asud-asud nga operasyon sang mga militar sa bahin sang Maguindanao Area batok sa mga remnants sang terorista nga grupo sang Daulah Islamiyah kag sang Bangsamoro Islamic Freedom Fighters nga padayon nga naga serbi nga pamahog sa siguridad kag kalinong sang pila ka mga residente.
Suno kay Suscano, wala sang dapat nga ikabalaka ang mga residente bangud naga focus ang otoridad sa paglagas sa mga nabilin pa nga pwersa sang mga rebelde kag mga terrorista nga grupo.
Gindugang pa niya, padayon nga ginabantayan sang militar ang mga lugar nga ginakabig nga hotspot lakip na ang Datu Odin Sinsuat area, Shariff Saydona Mustapha, Shariff Aguak, Mamasapano kag Datu Piang bangud sa presensya sang mga private armed groups kag mga insidente sang pagpamusil kag pagnilupok sang bomba nga may kaangtanan sa nagahilapit nga Bangsamoro parliamentary elections.
Bangud sini, ginpabaskog sang Armed Forces of the Philippines ang koordinasyon sa Philippine National Police kag mga lokal nga panguluhan para sa mas madamo nga checkpoint operations, visibility patrols kag dugang nga deployment sang security personnel sa mga lugar nga ginakabig nga high-risks.
Ginpasiguro man sini nga on top of the situation ang mga otoridad sa tanan nga mga panghitabo sa mga lugar nga may ara sang presensiya sang mga rebelde kag terrorista.
