Nagapangayo sang bulig ang isa ka overseas Filipino worker (OFW) nga taga-Koronadal City agud makapauli sa Pilipinas matapos nga ginpahayag sini nga indi na niya makaya ang sobra kalawig nga oras sang pag-obra bilang domestic helper sa Tabuk, Saudi Arabia.
Ginkilala ang OFW nga si Floremie dela Cruz, 35 anyos, residente sang Purok Maligaya, Barangay Carpenter Hill, Koronadal City. Sa interview sang Bombo Radyo Koronadal, iya ginpahayag nga naga-obra siya sang 19 tubtob 20 ka oras kada adlaw, nga nagresulta sa sobra nga kakapoy, pagkurog sang lawas kag pagbatyag sang pagsuka.
Mas nagdaku ang kabalaka sa iya kahimtangan matapos nga ginpahayag ni dela Cruz nga ginkulong siya sa sulod sang kwarto kag pila na ka adlaw nga wala pa makakaon.
Suno kay dela Cruz, nagpakig-istorya na siya sa iya amo kag ginpahayag nga indi na niya makaya nga tapuson ang nabilin nga apat ka bulan sang iya kontrata.
Handum niya nga makapauli na sa Pilipinas agud makapahuway kag mauntat ang iya ginapangatubang nga mabug-at nga kondisyon sa pag-obra.
Dugang pa niya, siya na lamang ang nagaisahanon nga naga-atipan sa mga bata kag nagahimo sang nagkalain-lain nga buluhaton sa daku nga balay nga may tatlo ka panalgan. Ini matapos nga ang iya kaupod nga domestic helper sadto ang nalipong, nga suno kay dela Cruz, may kaangtanan sa kakulang sang pagkaon kag pahuway.
Ginpahayag man niya nga nag-uyon ang iya amo sa iya handum nga magpauli, apang nagkomplido ang sitwasyon matapos nga gin-akusahan siya nga nagpangawat sang kwarta kag nagpadala sang karton ukon cargo sa iya pamilya sa Pilipinas.
Ginpanginwala ni dela Cruz ang akusasyon kag nagsiling nga wala siya nagpadala sang amo nga kargamento nga may unod sang kwarta. Suno sa iya, may yara siya sang mga ebidensya nga mahimo magasuporta sa iya pagpanginwala.
Isa pa sa iya ginreklamo amo ang limitado nga kahilwayan sa sulod sang balay, lakip na ang pagguwa kag pag-order sang mga kinahanglanon, bangud kinahanglan pa niya ang pagtugot sang iya mga amo.
Samtang, ginpahayag ni dela Cruz nga nakapalapit na ang iya himata sa Department of Migrant Workers (DMW) sa Koronadal City agud mangayo sang bulig, apang wala pa siya nakabaton sang update nahanungod sa iya reklamo.
Bangud sini, nagapanawagan siya sa publiko nga buligan siya nga makapauli sa madali nga tion. Ginlaygayan man niya ang mga Pilipino nga nagaplano magtrabaho sa luwas sang pungsod nga usisaon sing maayo ang ila kontrata, kondisyon sang pag-obra kag mga responsibilidad sang ila employer antes magdesisyon nga mag-abroad.
Madumduman nga ikatatlo na nga beses ni dela Cruz nga nagtrabaho sa Saudi Arabia. Ang iya una nga kontrata nagluntad sang duha ka tuig, samtang ang ikaduha nagdugay sang tatlo ka tuig. Sa iya karon nga pagbalik sa nasambit nga pungsod, nag-obra na siya sang 20 ka bulan.
Samtang ginahulat ang dugang nga impormasyon, ginalauman nga magapadayon ang Bombo Radyo Koronadal sa pag-follow up sa DMW Region 12 agud mahibaluan ang kahimtangan sang reklamo ni dela Cruz kag ang posible nga bulig nga mahatag sa iya.
