Ginpanawagan ni Professor Danilo Arao, convenor sang Kontra Daya kag propesor sa UP Department of Journalism, ang mas hugot nga pagbantay sang publiko sa paggamit sang pondo sang gobyerno, ilabi na sa tunga sang mga isyu nga nagalibot sa national budget.
Sa interview sang Bombo Radyo Koronadal, ginpahayag ni Arao nga mahimo magresulta sa komplikado nga sitwasyon sa konstitusyon ang pag-file sang motion for reconsideration sa desisyon sang Korte Suprema parte sa mga probisyon sang national budget.
Suno sa iya, posible man nga magpabilin ang status quo samtang ginahulat ang dugang nga aksyon, nga mahimo mag-apekto sa pag-aprubar kag pagpatuman sang proposed national budget para sa 2027, bisan pa may yara sang mga pamangkot parte sa mga ginakwestyon nga unconstitutional practices sa nagligad nga mga budget.
Dugang pa ni Arao, kinahanglan nga mangin aktibo ang publiko sa pagmonitor sang paggasto sang gobyerno agud masiguro nga ang pondo sang pungsod nagakadto sa mga sektor nga nagakinahanglan sini, kag malikawan ang posible nga pag-abuso ukon sayop nga paggamit sang pondo.
Ginpabug-atan man niya nga ang pagbantay sa national budget indi lamang parte sa korapsyon, kundi lakip man ang misappropriation ukon indi nagakaigo nga paggamit sang pondo, lakip na ang mga alokasyon para sa confidential kag intelligence funds sang nagkalain-lain nga ahensya sang gobyerno.
Para kay Arao, importante ang kahibalo kag pagpakigbahin sang publiko agud mapanabat ang mga nagapadalagan sang gobyerno kag masiguro nga ang kwarta sang pumuluyo nagagamit suno sa katuyuan sini.
