Nagpaalinton ang South Cotabato Police Provincial Office sa publiko parte sa mga dapat kag indi dapat himuon sa pagsaulog sang Undas 2026 agud masiguro ang seguridad sang tagsa ka pamilya, ilabi na sa pagbisita sa mga sementeryo.
Sa interview sang Bombo Radyo Koronadal kay PMajor JS Pedrosa, Chief sang Provincial Community Affairs and Development Unit sang South Cotabato PNP, ginpahanumdom niya ang publiko nga magplano sing temprano sang adlaw kag oras sang pagbisita sa mga lulubngan agud malikawan ang pagsulumpunganay sang mga tawo.
Ginlaygayan man niya ang mga pumuluyo nga siguruhon nga nakasirado sing husto ang mga puertahan kag bintana sang ila balay, kag bunuton ang mga appliances sa saksakan antes maghalin agud malikawan ang posible nga sunog ukon aksidente sa kuryente. Dugang pa, ginpaandaman ang publiko nga likawan ang pagbilin sang mga nota ukon senyales nga nagapakita nga wala sing tawo sa balay.
Indi man angay nga magpost sang mga litrato sang ATM ukon impormasyon nga mahimo maghatag sang ideya sa mga malain nga elemento parte sa ila lokasyon kag mga aktibidad. Ginpahanumdom man ang mga pumuluyo nga magdala sang payong bilang proteksyon sa init sang adlaw kag posible nga pag-ulan.
Ginpangabay man sila nga bantayan sing maayo ang mga kabataan nga kaupod sa pagbisita sa sementeryo. Sa katapusan, ginpabaskog liwat ni Pedrosa ang panawagan nga maghalong, magsunod sa mga patakaran, kag magpabilin nga malinong kag matinahuron sa pagdumdom sa mga pinalangga nga napatay sa sini nga Pista Minatay.
