Nagpaandam ang United Nations (UN) sa posibilidad sang mas mabaskog nga El Niño nga mahimo magdulot sang grabeng init, tuman nga mga hitabo sa panahon kag kakulang sang pagkaon sa nagkalain-lain nga bahin sang kalibutan.
Suno sa World Meteorological Organization (WMO), posible nga mangin indi ordinaryo ang kabaskog sang sini nga hitabo, nga ginapaabot maglab-ot sa Disyembre 2026 kag magapadayon tubtob sa 2027. Ginpahayag ni WMO Secretary-General Celeste Saulo nga nagakatabo na ang mga ekstremong kondisyon sang panahon, kag mahimo pa ini maglala samtang nagabaskog ang El Niño.
Ginpabutyag man ni UN Undersecretary-General for Humanitarian Affairs Tom Fletcher nga posible nga maapektuhan sang mabug-at ang Latin America, sidlangan kag bagatnan nga Africa, kag ang Asia kag Pacific region.
Lakip sa ginakabalak-an ang pagsaka sang presyo sang krudo kag abono, pagbalhin sang mga residente sa mas luwas nga lugar, kag pagdamo sang mga tawo nga nagakinahanglan sang bulig.
Dugang pa ni Fletcher, posible nga mag-atubang sang tumang nga kagutom ang minilyon ka tawo kun indi mahagan hagan ang mga epekto sini. Bangud sini, ginapanawagan sang UN ang mga gobyerno, development banks kag internasyonal nga mga institusyon nga magpreparar antes pa mag-abot ang pinakamabug-at nga epekto sang El Niño.
Bisan indi mapunggan ang El Niño, ginpahayag sang mga opisyal nga mahimo pa maminusan ang mga peligro paagi sa temprano nga pagpanghanda, pagplano sa suplay sang pagkaon kag paghatag sang bulig sa mga komunidad nga mas delikado maapektuhan.
