Nag-isyu na sang kapin 40 ka subpoena ang Philippine National Police (PNP) Criminal Investigation and Detection Group (CIDG) may kaangtanan sa 521 ka kilo nga methamphetamine ukon shabu nga nakumpiskar sa Laos.
Suno kay CIDG Director PMGen. Robert Alexander Morico II, 11 sa mga persona nga nakabaton sang subpoena ang ginakabig nga persons of interest sa nagapadayon nga imbestigasyon sa nasambit nga drug shipment.
Samtang, ginatigom pa sang CIDG ang dugang nga mga dokumento kag iban nga impormasyon nga may kaangtanan sa kaso. Suno sa ahensya, isumiter nila ini sa talatapan ni PNP Chief General Jose Melencio Nartatez Jr. kag sa Philippine Drug Enforcement Agency (PDEA) sa Biyernes.
Una na nga ginpahayag sang CIDG nga 21 ka persona ang ila gin-isyu-han sang subpoena agud makakuha sang dugang nga impormasyon kag maklaro ang ila posible nga kaangtanan sa 521 ka kilo nga shabu nga nasabat sa Laos.
Ang pag-isyu sang subpoena kabahin sang proseso sang imbestigasyon agud makakuha sang mga pahayag kag impormasyon nga makabulig sa pag-usisa sang kaso. Apang, ang pagbaton sang subpoena ukon pagkabig nga person of interest indi nagakahulugan nga napamatud-an na nga may sala ang isa ka persona.
Padayon pa ang pagtipon sang CIDG sang mga dokumento kag ebidensya agud matun-an ang mga sirkumstansya sa likod sang nasambit nga drug shipment kag matumod ang mga persona nga mahimo may kaangtanan sa kaso.
