Ginhangkat ni Sen. Juan Miguel Zubiri si Agriculture Secretary Francisco Tiu Laurel Jr. nga magpatuman sang mas istrikto nga aksyon batok sa manipulasyon sang presyo sang baboy, smuggling kag sobra nga importasyon sang karne agud mabuligan nga mga lokal nga hog raisers.
Ginpalab-ot ni Zubiri ang panawagan sa Senate hearing sang Miyerkules may kaangtanan sa proposed budget sang Department of Agriculture (DA), kun sa diin ginpahayag niya nga kinahanglan ang mas aktibo nga pag-inspeksyon sa mga merkado kag pagpatuman sang mga tikang batok sa mga nagamanipula sang presyo.
Suno kay Zubiri, nagnubo ang farmgate price sang baboy halin sa P185 kada kilo sang 2024 pakadto sa P90 tubtob P120 kada kilo sa sini nga tuig, nga mas manubo sa ginabulubanta nga production cost nga P130 tubtob P140 kada kilo.
Bangud sini, nagakabudlyan ang mga hog raisers, ilabi na ang mga backyard producer nga nagarepresentar sa ginabanta nga 80 porsyento sang mga nagaproduce sang baboy sa pungsod.
Ginkwestyon man sang senador kun ngaa mataas gihapon ang presyo sang karne sa merkado bisan manubo ang farmgate price. Ang pork belly, halimbawa, nagabaligya tubtob P380 kada kilo, samtang may mga magbababoy sa Mindanao nga nagabaton lamang sang mga P100 kada kilo sang buhi nga baboy.
Samtang, ginpahayag ni Laurel nga ginakonsiderar sang DA ang 60-adlaw nga temporaryo nga pagsuspender sang importasyon sang kasim, pigue kag pork belly, ukon ang pagpahunong anay sa pag-isyu sang bag-o nga Sanitary and Phytosanitary Import Clearances (SPSIC).
Ini nga mga tikang ginakonsiderar sa tunga sang panawagan nga protektahan ang lokal nga industriya sang baboy kag masolbar ang kinalain sa farmgate kag retail prices.
