Nagdangat na sa P1.79 bilyon ang napagkit nga damyos sa sektor sang agrikultura bangud sa epekto sang habagat kag mga nagligad nga bagyo nga Luis, Maymay kag Neneng.
Suno sa Department of Agriculture (DA), 51,229 ka mangunguma ang naapektuhan sang malain nga kahimtangan sang panahon.
Base naman sa datos sang DA Disaster Risk Reduction and Management Operations Center (DRRM-OpCen), 41,647 ka ektarya sang uma ang naapektuhan, samtang 44,745 metriko tonelada sang mga produkto ang napagkit nga nadula.
Lakip sa mga naapektuhan ang Ilocos Region, Cordillera Administrative Region, Cagayan Valley, Central Luzon, CALABARZON, MIMAROPA, Bicol Region kag Western Visayas.
Apang posible pa nga magdako ang balor sang damyos bangud padayon pa ang assessment sang DA sa mga lugar nga naapektuhan sang kalamidad.
Ginapatigayon pa sang ahensya ang pag-validate sang mga report agud mahibaluan ang bug-os nga epekto sang kalamidad sa mga mangunguma kag produksyon sang agrikultura.
