Ginatun-an sang Department of Agriculture (DA) ang temporaryo nga paglimit sa importasyon sang karne sang baboy sa Nobyembre agud mabuligan ang lokal nga mga hog raiser nga nagaatubang sang pagnubo sang presyo kag kaperdihan.
Suno kay Agriculture Secretary Francisco Tiu Laurel Jr., posible nga untaton ang pag-isyu sang import clearance para sa pila ka klase sang baboy sa sulod sang 30 tubtob 60 ka adlaw.
Lakip sa mahimo maapektuhan ang pork belly, nagkalain-lain nga pork cuts, jowls kag bug-os nga baboy. Base sa datos sang Bureau of Animal Industry, nagdangat sa 602,655 metric tons ang importasyon sang baboy tubtob Agosto, mas mataas sang lima ka porsiyento.
Samtang, ginarepaso sang Tariff Commission ang panugyan nga pataason ang taripa sa imported nga baboy agud maproteheran ang lokal nga industriya. Apang, kinahanglan pa sang legal nga pagrepaso kag pag-apruba sang gobyerno antes ipatuman ang bisan ano nga restriksyon.
Magapadayon man ang DA sa pagbaton sang aplikasyon para sa importasyon sang pila ka produktong pang-agrikultura sa idalom sang Minimum Access Volume (MAV) para sa 2027.
