Nagtibusok sa bag-o nga record low nga P63.09 kontra sa US dollar ang piso sang Lunes bangud sa padayon nga pagpalig-on sang dolyar tuga sang mga geopolitical uncertainty sa nagkalain-lain nga bahin sang kalibutan.
Suno sa mga report, nagnubo sang 10.5 centavos ang piso halin sa P62.985 sang Biyernes.
Samtang, nagsaka sa $1.778 billion ang kabug-usan nga volume sang foreign exchange, kumpara sa nagligad nga $1.598 billion.
Suno kay Philippine Institute for Development Studies (PIDS) Senior Fellow John Paolo Rivera, ang pagluya sang piso resulta sang mataas nga presyo sang petrolyo, geopolitical tension, nagadako nga balance of payments deficit, kag mataas nga demand para sa foreign currency.
Samtang, ginpahayag sang ekonomista nga si Michael Ricafort nga ang paghulag sang palitan mas ginatunaan sang mga external factor kag malapad nga pagpalig-on sang dolyar.
Apang, nagpabilin nga medyo stable ang piso kon ikumpara sa iban nga mga currency, nga posible nga may kaangtanan sa interbensyon sang Bangko Sentral ng Pilipinas (BSP).
Nagpaandam man ang mga ekonomista nga ang malawig nga pagluya sang piso mahimo magresulta sa mas mataas nga inflation kag magpakanubo sa ikasarang sang mga pamilya nga Pilipino nga magbakal sang ila mga kinahanglanon.
