Monetary Board, ginpasaka ang target RRP rate sang 25 basis points

Ginpaathag sang Monetary Board sang Bangko Sentral ng Pilipinas (BSP) ang 25 basis points nga pagsaka sa Target Reverse Repurchase (RRP) Rate, gani ini nag-abot na sa 5.0%.

Ginpasaka man ang overnight deposit kag lending facility rates sa 4.5% kag 5.5%, suno sa BSP.

Ini nga tikang ginpatuman agod makontrol ang posible nga pagsaka sang inflation bangud sa El Niño, pagbag-o sang presyo sang lana, kag posible nga pagsaka sang sweldo.

Ginalauman nga maglapaw anay sa 4.0% ang average headline inflation sa 2026 kag 2027 antes ini magnubo padulong sa 3.0% nga target sa 2028.Ginpahayag sang BSP nga handa ini magpatuman sang dugang nga mga tikang sa monetary policy agod mapabilin nga stable ang presyo sang mga baraklon sa pungsod.