Gin-ako ni Iloilo First District Representative Janette Garin nga ginpulitika lamang ang kontrobersya sa Dengvaxia, kasunod sang desisyon sang Sandiganbayan nga maabswelto siya kag ang iya mga kaupdanan sa kaso.
Ginabswelto sang anti-graft court si Garin, anay kalihim sang Department of Health (DOH), sa mga kaso nga graft kag technical malversation nga may kaangtanan sa pagbakal sang Dengvaxia vaccine nga nagabalor sang P3.55 bilyon sang 2015.
Ginpahayag ni Garin nga gingamit sang mga anti-vaccine group kag sang iya mga kontra sa politika ang isyu agud magtudlo sang sala sa iya, ilabi na kun may mga kapalpakan ukon kuwestiyonable nga pagbakal sang bulong sa DOH.
Dugang pa sang kongresista, napamatud-an kuno sa korte nga wala siya nakabaton sang bisan ano nga kwarta halin sa pondo sang proyekto.
Ginpahayag man niya nga nag-upod siya sa kapin 20 ka siyentista sa pagdepensa sang siyensiya kag sang mga opisyal nga dokumento nga ila ginpresentar.
Suno kay Garin, dako ang negatibo nga epekto sang kontrobersya indi lamang sa iya kundi pati sa mga doktor, researcher kag eksperto sa panglawas publiko nga nagaatubang sang problema sa paglapta sang sala nga impormasyon.
Bangud sini, nanawagan siya sa mga eksperto nga magpadayon sa ila trabaho kag indi madulaan sang paglaum agud mabalik ang pagsalig sang publiko sa mga bakuna kag sa sistema sang panglawas publiko.
