Nakabaton sang financial assistance ang 32 ka pamilya sa Barangay General Paulino Santos (GPS), Koronadal City, matapos maguba ang ila mga puluy-an bangud sang mabaskog nga hangin kag ulan sang Setyembre 27, 2026, nga ginreport nga epekto sang buhawi.
Sa interview sang Bombo Radyo Koronadal, ginpahayag ni Barangay GPS Kapitan Danilo delos Santos, kapin 60 ka panimalay ang naapektuhan sang insidente, lakip ang mga balay nga natumbahan sang kahoy kag nadulaan sang atop.
Naghatag ang city government sang financial assistance nga nagalakip sang ₱8,000, ₱5,000, ₱3,000 kag ₱2,000, depende sa kabug-aton sang danyos.
Lima ka panimalay naman ang nakarekord sang total damage kag nakabaton sang construction materials halin sa barangay para sa pagpatindog liwat sang ila mga puluy-an.
Samtang, nagapadayon ang validation sang mga halit kag ginapaabot pa ang dugang nga bulig para sa iban nga apektado nga pamilya.
Nagpadala man ang barangay sang mga report sa congressional district kag provincial government agud mangayo sang dugang nga suporta.
Dugang pa ni Delos Santos, nagapadayon ang regular nga pagmonitor kag pag-declogging sang mga kanal agud mapauswag ang pag-ilig sang tubig kag maminusan ang risgo sang pagbaha.
Ginpanawagan man niya sa mga residente nga maghalong sa mga kahoy nga posible magtumba kon mabaskog ang hangin.
