Ginkwestyon sang Commission on Audit (COA) ang Sandiganbayan bangud sa mga iregularidad sa mga dokumento sang nagasto sa mga overseas trip sang pila ka justices kag personnel, subong man sa pag-organisa sang mga event sa pila ka four-star kag five-star hotel venues.
Base sa ginpagwa nga annual audit report sang anti-graft court sang 2025, natukiban sang Commission on Audit nga gin-aprubahan ang liquidation sang “cash advance” nga naglab-ot sa P11,869,847.98 para sa foreign travels sang mga opisyales kag empleyado sang Sandiganbayan sang 2025, apang ini ang kulang sa nagakaigo kag kompleto nga mga dokumento.
Suno sa report sang COA, ini nga mga biyahe nagalakip sang pito ka foreign trip, nga kalabanan mga komperensya kag training sa US state sang Missouri; Victoria, Australia; Budapest, Hungary; Dubai, United Arab Emirates; Doha, Qatar kag Singapore, halin Setyembre tubtob Disyembre sang 2025.
Natukiban man nga ang isa sa pinakamahal nga foreign trip amo ang sa Hungary nga nagabalor sang P2.5 milyon, ang sa Dubai nga nagabalor sang P1.88 milyon, samtang ang biyahe sa Singapore nagasto sang P1.82 milyon.
Suno sa polisiya sang anti-graft court nga ginpatuhuyan sang COA, ang presiding justice lamang ang may kinamatarong nga mag-business class, samtang ang iban pa nga mga empleyado ang ginatugutan lamang nga mag-avail sang official economy class, kun indi ini pagasabton sang host country ukon sponsoring organization.
