Nagtililipon ang mga supporter sang anay Pakistan Prime Minister nga si Imran Khan kag nagpanawagan nga hilwayon siya sa prisuhan bangud sa kabalaka sa iya kahimtangan sa panglawas.
Ini matapos ginbuyagyag sang pamilya ni Khan nga nagalala ang kondisyon sang iya tuo nga mata kag posible nga madulaan sang dako nga bahin sang iya panan-aw.
Ginpahayag sang pamilya nga wala pa sang nagakaigo nga tikang ang mga prison authorities para sa iya kahimtangan.
Nahibaluan nga nagaatubang ang cricket star antes nangin politiko nga si Khan sang masobra 100 ka kaso kag nasentensyahan sang masobra 17 ka tuig nga pagkapriso sa mga kaso may kaangtanan sa korapsyon.
Lakip sa mga kaso ang pagdumala sang state gifts kag pagpagwa sang sensitibo nga impormasyon sang gobyerno.
Madumduman nga napriso si Khan halin Agosto 2023 upod ang iya asawa nga si Bushra Bibi.
Samtang, ginpahugot sang mga otoridad ang seguridad sa palibot sang prison facility diin nakapriso si Khan agud malikawan ang posible nga pagkinagamo kag masiguro ang seguridad sang iban pa nga mga inmates.
Sa karon, nagapadayon naman ang panawagan sang iya pamilya kag mga supporter para sa iya nagakaigo nga medical care samtang yara siya sa prisuhan.
