Nagalaum ang Chief of Hospital sang South Cotabato Provincial Hospital nga mangin tertiary-level hospital na ini sa palaabuton, upod ang target nga 500-bed capacity sa ginaplano nga expansion sang pasilidad.
Kabahin ini sang ginapatigayon nga pagpalapad sang ospital agud masarangan sini nga makahatag sang mas mataas kag mas komprehensibo nga serbisyo medikal sa mga pumuluyo sang South Cotabato kag mga kasikbit nga lugar.
Suno sa Chief of Hospital nga si Marlyn D. Abantao sang South Cotabato Provincial Hospital, iya ginpahayag nga lakip sa ginatarget nga mapabakod ukon madugangan sa pagpalapad sang ospital amo ang mga serbisyo kag departamento pareho sang Obstetrics and Gynecology (OB-GYN), Family Medicine kag Internal Medicine, lakip ang iban pa nga espesyalidad nga kinahanglanon sa tertiary-level nga pag-atipan.
Paagi sa pagdugang sang kapasidad, pasilidad kag medical departments, ginapaabot nga mas madamo nga pasyente ang mahatagan sang nagakaigo nga pag-atipan kag maminusan ang panginahanglan nga magpa-refer sa mas mataas nga healthcare facilities sa iban nga lugar.
