Mahimo magpabilin nga mataas sa target sang gobyerno ang inflation sa Pilipinas tubtob sa katapusan sang 2026, suno sa Congressional Policy and Budget Research Department (CPBRD).
Ginpahayag sang CPBRD nga mahimo mag-abot sa 5.5% tubtob 6.1% ang full-year inflation rate.
Mas mataas ini sa 3% nga target sang Bangko Sentral ng Pilipinas kag mahimo man malab-ot liwat ang sobra 7% sa ikaduha nga bahin sang tuig.
Para sa ikatatlo nga quarter, ginatagna sang ahensya ang inflation sa 6.37% tubtob 7.32%.
Samtang, ginapaabot naman nga yara sa 5.91% tubtob 7.31% ang inflation sa ikaapat nga quarter.
Ginpahayag sang CPBRD nga posible magsaka liwat ang presyo bangud sa malain nga harvest, epekto sang El Niño, problema sa suplay sang abono kag padayon nga tensyon sa Middle East.
Lakip pa sa mga risgo ang mas mataas nga presyo sang kuryente, pagnubo sang balor sang piso kag pagsaka sang suweldo.
Suno sa CPBRD, mahimo nga mangin pinakamataas ang inflation sang Pilipinas sa Southeast Asia kon ikomparar sa bag-o nga mga projection sang nagkalain-lain nga international institutions.
Agud mapunggan ang padayon nga pagsaka sang presyo, ginawhag sang ahensya nga magpatuman ang administrasyo ni Marcos sang mas konserbatibo nga fiscal policy kag “leaner, smarter” nga 2027 national budget.
