Posible nga unahon anay ang pagresolbar sang pila ka mga mosyon kag procedural issues sa una nga adlaw sang impeachment trial batok kay Vice President Sara Duterte.
Suno kay House Prosecution spokesperson Ace Barbers, kinahanglan nga hapsay kag lig-on ang pag-uswag sang trial kag masiguro nga wala sang procedural lapses ukon legal nga problema agud padayon ini nga mapatigayon.
Ginpahayag niya nga ang pag-ayo anay sang mga procedural issues isa ka importante nga tikang antes umpisahan ang pagpresentar sang mga ebidensya kag mga testigo, nga mahimo na himuon sa masunod nga mga adlaw.
Magaumpisa sa Lunes ang impeachment trial batok sa Bise Presidente kag ginapaabot nga magalawig sang sobra pito ka bulan.
Suno pa kay Barbers, plano sang tanan nga mga prosecutor nga magtambong sa una nga adlaw sang hearing, lakip na ang mga bag-o nga private prosecutor nga wala pa nakapasa sang ila entry of appearance.
Ginpat-od man niya nga handa na ang prosecution panel sa pagpresentar sang ebidensya kag mga testigo, bisan pa sa posibilidad nga magalawig ang trial.
Dugang pa ni Barbers, maayo ang pagbuligay sang mga abogado bisan nagkalain-lain ang ila legal nga eksperyensya kag kadamuon.
