Ginpahayag sang Kontra Daya Convenor nga kinahanglan nga tutukan sang defence team ni Vice President Sara Duterte ang pagpreparar sa palaabuton nga impeachment trial sa Senado.
Sa exclusive interview sang Bombo Radyo Koronadal kay Prof. Danilo Arao sang University of the Philippines Diliman Department of Journalism, ginpahayag niya nga dako nga hangkat sa depensa ang pag-atubang sa apat ka articles of impeachment batok sa bise presidente.
Suno sa iya, indi kinahanglan nga tanan nga alegasyon mapamatud-an agud ma-convict ang isa ka opisyal bangud isa lang sa mga ginapresentar nga kaso ang kinahanglan mapamatud-an sa impeachment trial agud magresulta sa conviction kag posible nga madula ang iya katungdanan kag indi na makapadagan sa palaabuton nga mga eleksyon.
Ginpaabot man ni Arao nga ginapaabot sang publiko ang argumento sang prosecution kag depensa agud ma-balance ang mga ebidensiya nga ipresentar sa korte sa Senado.
Samtang, ginarespeto man niya ang nagkalain-lain nga panan-aw sang mga Pilipino nga nagasuporta ukon nagakontra sa impeachment, apang ginpahanumdom sang propesor nga dapat magbase ang paghusga sa kamatuoran nga mapakita paagi sa mga ebidensiya sang duha ka panig.
