Matigdas nga ginpahayag sang Integrated Bar of the Philippines (IBP) nga legal kag balido ang sesyon sang Senado sang Hunyo 3, sa tunga sang mga kuwestiyon bahin sa quorum.
Nagsiling ang IBP nga ang ila panindugan nakabase sa desisyon sang Korte Suprema sa kaso nga Avelino v. Cuenco (1949).
Sa interview sang bombo Radyo Koronadal kay Atty. RJ Sustiguer- IBP SoGen Chapter ginpahayag sini ngaang tanan nga aksyon, resolusyon, kag desisyon sa nasambit nga sesyon, lakip ang pagtal-os kay Sen. Sherwin Gatchalian bilang Senate President Pro Tempore kag ang pagtudlo sang bag-o nga mga lider sang komite, ginakabig nga opisyal kag may bisa.
Ginpaathag pa sang organisasyon nga husto ang presensya sang 12 ka senador agud makakreer sang quorum, bangud may duha ka senador nga indi ginakabig nga available sa pagtuman sang ila katungdanan nga sanday Sen. Jinggoy Estrada nga yara sa prisohan bangud sa kaso nga plunder, kag si Sen. Ronald “Bato” Dela Rosa nga wala pa matumod ang iya lokasyon.
Gani, 22 na lamang ang ginakabig nga aktibo ukon available nga miyembro sang Senado, kag ang 12 ka senador nga nagtipon husto para sa quorum.
Naguwa ang isyu matapos nga wala natambong ang Majority bloc sa plenary session nga ginapangunahan ni Senate President Alan Peter Cayetano.
Sa pihak sini, nag-attend si Sen. Francis “Chiz” Escudero kag nagupod sa 11 ka miyembro sang minorya kag iban pa, nga nagresulta sa pagkumpleto sang kinahanglan nga numero para sa quorum.
Sa separado nga pahayag, ginpahayag sang kampo ni Gatchalian nga ang quorum dapat ibase sa numero sang mga senador nga may kapasidad magtuman sang ila katungdanan.
Suno sa ila, ini nagasuporta sa interpretasyon sang Korte Suprema nga 12 sa 23 ka senador sarang makahimo sang constitutional quorum sa Senado.
