Ginpaathag ni NBI Director Melvin Matibag ang resulta sang paraffin test kay Mel Oragon, ang volunteer driver nga ginpahayag nga nagpalupok sang armas sa Senado sang Mayo 13.
Suno sa direktor sang National Bureau of Investigation, bisan nagpositibo si Oragon sa gunpowder residue, wala ini nagakahulugan nga sigurado nga siya ang nag-usar ukon nagpalupok sang armas.
Ginpabag-utan niya nga ang paraffin test indi nagahatag sang eksaktong konklusyon nga may direkta nga paghawid ukon pag-usar sang armas ang isa ka indibidwal.
Ginpaathag niya nga posible man nga ang gunpowder residue nabalhin lang sa lawas ni Oragon halin sa iban nga persona ukon sa palibot.
Ginpahayag niya nga gindala si Oragon sa Senado kag ginpahapa sa lugar nga mismo ginpabutukan sang mga miyembro sang Senate Office of the Sergeant-at-Arms, nga posible may yara pa sang nabilin nga gunpowder sa area, nga amo ang mahimo nga nakabalhin sang residue sa iya lawas.
Gindugang niya nga ang presensya sang gunpowder sa palibot sang insidente isa ka rason nga dapat tagdon sa pag-analisa sang resulta sang test, kag indi dayon dapat gamiton bilang pruweba sang direkta nga pagpalupok sang armas.
Madumduman nga mabaskog nga ginpanginwala ni Oragon nga siya ang nagpalupok sang armas sa tunga sang kinagamo sa Senado, kag ginpahayag niya nga may video pa nga makapamatuod nga wala siya sang armas ukon pag-apil sa pagpabuto sa oras sang insidente.
