Ginkumpirma ni Senador Juan Miguel “Migz” Zubiri nga opisyal na nga nagbalhin si Senador Mark Villar sa Senate Majority bloc sini nga Huwebes, Oktubre 8.
Bangud sa pagbalhin ni Villar, nagdamo sa 14 ang kabug-usan nga miyembro sang Majority bloc, samtang nagpabilin sa 10 ang mga miyembro sang Minority sa Senado.
Kasunod sang iya pagbalhin, ginpili si Villar bilang bag-o nga chairman sang Senate Committee on Public Works and Highways agod pangunahan ang mga panukala kag diskusyon may kaangtanan sa imprastraktura.
Luwas sa iya bag-o nga chairmanship, ginpili man ang senador bilang isa sa mga miyembro nga magarepresentar sa Senado sa Commission on Appointments (CA).
Ginapaabot nga ang opisyal nga pagrealign sang puwesto ni Villar sa mataas nga kapulungan makahatag sang dugang nga suporta sa mga lehislatibo nga agenda sang Majority bloc.
Antes siya na-eleher sa Senado, nagserbi si Villar bilang kalihim sang Department of Public Works and Highways (DPWH) sa idalom sang administrasyong Duterte, diin iya ginpanguluhan ang pagpatuman sang mga dako nga proyekto sa publiko bilang kabahin sang programa nga Build, Build, Build.
Ang iya malapad nga eksperyensya sa sektor sang public infrastructure amo ang nangin isa sa mga basehan sang iya pagkatalaga sa komite, samtang ang iya puwesto sa Commission on Appointments naghatag man sa iya sang papel sa proseso sang pagrepaso kag pag-apruba sang mga nominasyon sa gobyerno.
