Nagpanawagan ang mayor sang banwa sang Norala sa mga content creator nga gamiton ang ila plataporma sa paghimo sang mga video nga makabulig kag makahatag sang maayo nga imahe sa banwa.
Sa interview sang Bombo Radyo Koronadal kay Mayor Clemente Fedoc sang Norala, South Cotabato, ginpabutyag man ni Fedocs ag nag-viral sa social media ang video sang isa ka vlogger nga ginakabig nga kontrobersyal bangud may kaangtanan ini sa isa ka Person With Disability nga bulag.
Suno sa alkalde, iga patawag niya sa sunod nga semana ang nasambit nga vlogger nga ginakilala bilang Inday Pasayan matapos siya makabaton sang mga report halin sa katawhan kaangot sa nagalapta nga video.
Ginpahayag man ni Mayor Fedoc nga kilala niya ang vlogger bangud nagaubra ini sang bulak para sa mga patay nga iya ginakadtu-an sa nagkalain-lain nga okasyon.
Sa pihak sini, ginpanginwala man sang alkalde ang naga-lapta sa social media nga may ginpromisa siya sa vlogger nga magsaka sa isa ka poste kag magsaot sa dalan nga naka-two piece.
Dugang pa ni Mayor Fedoc nga sa subong wala pa sang ordinansa ang munisipyo nga nagabawal ukon nagadumili sa mga vlogger nga nagaubra sang bastos nga content sa ila lugar.
Sa pihak nga bahin, ginpahayag man ni Mayor Fedoc nga nangin matawhay kag wala sang ginreport nga insidente ukon kinagamo ang bug-os nga selebrasyon sang kapistahan sang banwa sang Norala nga nagtalop sang Marso 10.
