Nagapadayon sa subong nang madalom nga imbestigasyon sang mga otoridad angot sa pagkapatay sa isa ka kindergarten pupil makaligad nga naigo ini sa ulo sang nagtalang nga bala halin pa sa wala mahibaluan nga direksyon samtang yara sa sulod sang isa ka buluthuan sa Damabalas Elementary School, Datu Piang, Maguindanao del Sur.
Suno sa mga otoridad, gintilawan pa nga idangat sa balay bululngan ang nasambit nga bata agud nga dapatan sang bulong apang gindeklarar ini nga dead on arrival sang attending physicians.
Puno naman sang papangasubo ang pamilya sang biktima bangud nakatalana kuntani ini nga magpasakop sa ila nga naka-schedule nga pictorial buwas para sa ila nga graduation ceremony apang nagluntad ang masubo nga insidente.
Padayon naman ang pagpangita sang mga kapulisan ang persona nga ara sa likod sang krimen kag matumod kun diin naghalin ang nasambit nga bala.
Ginganyat naman sa subong sang lokal nga gobyerno kag mga otoridad ang publiko nga makig-angot sa imbestigasyon agud nga mapanabat ang may kahumuan sa krimen kag agud malikawan man ang kulukasubong nga panghitabo sa madason pa nga mga tion.
