Ginpahayag sang isa ka food vendor sa Syudad sang Koronadal ang iya pag dis-ayre sa panawagan sang Philippine Rice Research Institute (PhilRice) nga magkaon sang tunga lamang ka cup sang kan-on agud malikawan ang pag-usik sang bugas.
Sa interview sang Bombo Radyo Koronadal, ginpahayag ni Almi Casiple, food vendor, nga indi ini praktikal para sa mga tawo nga pareho sa iya nga nagatrabaho sa guwa kag nagakinahanglan sang bastante nga kusog agud maatubang ang adlaw-adlaw nga obra.
Suno kay Casiple, wala man sang malain kun magkaon sang sobra sa tunga ka cup sang kan-on, basta siguruhon lamang nga wala ini ginauyangan.
Gindugang pa niya nga dapat respetuhon ang kan-on bangud isa ini ka grasya kag importante nga pagkaon, ilabi na sa tunga sang nagataas nga gasto sa pangabuhi.
