Nakabaton ang Philippine Coast Guard (PCG) sang indi magnubo sa walo ka radio challenge gikan sa mga Chinese warships samtang nagalibot sila sa Bajo de Masinloc sa West Philippine Sea, suno sa pahayag sang ahensya.
Ang insidente nagluntad samtang nagapatigayon sang Maritime Domain Wwareness (MDA) flight ang eroplano sang PCG sa sulod sang Exclusive Economic Zone (EEZ) sang Pilipinas.
Sa operasyon, ginmonitor sang PCG ang napulo ka barko sang China, lakip ang lima ka militia vessels, tatlo ka barko sang China Coast Guard, kag duha ka warship sang China Navy.
Suno kay PCG Spokesperson for West Philippine Sea Commodore Jay Tarella, ang eroplano sang PCG nagsabat sang nagakaigo sa mga radio challenge, nga nagapanindugan nga yara sila sa teritoryo sang Pilipinas kag lehitimo ang ila paglupad para sa nasambit nga aktibidad.
Ginpahayag man niya nga ini nga operasyon bahin sang regular nga monitoring kag surveillance activities sang PCG agud masiguro ang seguridad kag soberanya sang Pilipinas sa West Philippine Sea.
Ginpabutyag ni Tarella nga padayon nga magahimo sang coordinated patrols kag monitoring ang PCG sa lugar, kag magapabilin nga alerto sa bisan ano nga hulbot sang mga barko sang iban nga pungsod sa EEZ sang Pilipinas.
Ang ahensya nagapanawagan man sa tanan nga mga maritime actors nga magrespeto sa soberanya sang Pilipinas kag sa internasyonal nga mga lagda sa dagat.
