KORONADAL CITY – Nagapadayon ang imbestigasyon sang mga otoridad sa kamatayon sang isa ka laborer nga nasapwan na lamang nga wala sang kabuhi sa isa ka Construction site sa Purok Martinez, Barangay Zone IV, Koronadal City pasado alas-7 kaina sang aga, Lunes, Oktubre 20,2025.
Ginkilala ang biktima nga si Jun Oren, 31-anyos, isa ka laborer kag residente sang Purok Maharlika, Barangay Zone 3, Koronadal City.
Sa interview sang Bombo Radyo Koronadal kay Rudy Oren amay sang biktima, ginapahayag sini nga isa na ka semana nga wala nakapauli sa ila balay ang biktima kag wala ini sang ihibalo kun may kaaway ang bata sini.
Suno kay Manong Rudy, nahibaluan na lamang sini sa iya bayaw nga magapauli ang iya bata, apang nasubuan ini sang nabalitaan nga nasapwan na lamang nga duguon kag patay na ang biktima.
Sa karon, emosyonal nga nagpanawagan sang hustisya ang amay sang biktima ilabi na sa kapulisan nga nagapatigayon sang imbestigasyon.
Nahibaluan nga nakit-an sa crime scene malapit lamang sa bangkay sang biktima ang isa ka tubo nga may dugo nga gginapatihan amo ang gingamit sa paglampos sa iya.
Samtang, nadula naman ang motorsiklo sini nga Skygo 125 , nagaduag sang Blue kag Itom, nga may plate number MXY 517, nga ginapatihan gindala sang suspetsado.
Ginahibalo pa sang mga otoridad ang identity sang suspek kag kun ano ang motibo sang krimen.
Ginalauman naman sang kapulisan nga makabulig sang dako ang kuha sang CCTV footage sa lugar kun sa diin nasapwan ang bangkay sang biktima.
