KORONADAL CITY – Nagapadayon ang imbestigasyon sang mga otoridad sa nagluntad nga pagpamusil-patay sa duha ka indibidwal samtang duha naman ang napagkit nga pilason sang ginpaulanan sang bala ang isa ka SUV nga ginasakyan ni Barangay Poblacion 5 Cotabato City Chairperson, Pahima Pusaka sa bahin sang Jose Lim Street Poblacion 5 Cotabato pasado alas-10 sang aga kahapon September 16,2025.
Patay sa nasambit nga pagpangluthan si Mike Pusaka nga bana ni Poblacion 5 Chairperson Pahima Pusaka.
Kalakip man sa mga ginbawian sang kabuhi ang isa ka payong payong driver nga nalamita lamang sa pagpangluthang suno naman kay Cotabato City PNP Spokesperson PLT. Rochelle Evangelista.
Pilason naman ang duha ka mga persona nga sanday Poblacion 5 Chairperson Pahima Pusaka kag ang 11 years old nga anak ni Kapitana Pusaka nga ginkilala nga si ” Zay “.
Sa inisyal nga imbestigasyon san mga otoridad, sakay ang mga biktima sang iala nga SUV nga Toyota Fortuner nga may plate number nga LAL 8792 samtang gina-usoy ang Jose Lim Street sang hinali na lamang suno pa nga gindikitan sang apat(4) ka mga wala pa makilal-an nga mga suspek nga sakay naman sang tatlo (3) ka mga motorsiklo kag wala sang untat nga ginluthang sang makapila pa ka beses.
Nag-angkon naman sang igo sa nagkalain-lain nga bahin sang kalawasan ang mga biktima kag nangin tunaan sang kamatayon sang isa ka padre-de-pamilya lakip na ang wala sang kahilabtanan nga payong-payong driver.
Narekober sa Crime scene ang masobra 50 ka mga basiyo sang mga bala nga ginapatihan nga halin sa 9mm kag 45 caliber pistol.
Nagapadayon naman ang imbestigasyon sa krimen lakip na ang pagtumod sa mga suspek kag ang motibo sa nasambit nga pagpangluthang.
Samtang, nangin masubo naman ang pamilya sang mga biktima sa nagluntad nga pagpangluthang sa diin ginalantaw sang mga ini nga politika ang motibo sang krimen.
